Að gera hlutina af alúð er vinna sem gefur til baka!

Klukkan er níu þennan fimmtudagsmorgun og hér í Siglufirði kyngir niður snjónum eins og svo oft áður. En það er tiltölulega hlýtt og stillt svo það gerir bara ekkert til. Siglufjörður er og verður snjóþungur og margan skaflinn hefur maður klofað í gegnum árin til að komast leiðar sinnar og kippir sér ekki mikið upp við smá hríðarhraglanda.

En tilefni þessara skrifa minna er ekki snjókoman þennan mæta morgun heldur mamma mín og heimilið sem hún hefur búið sér og sínum hér í bænum. Ég hef farið víða en hvergi hef ég fundið fyrir annarri eins hlýju og væntumþykju á bak við þá hluti sem fylla húsið hennar. Hús og hýbýli hefðu lítinn áhuga, held ég, þar sem hér er ekkert verið að kaupa fræg merki eða hönnun. Nei, hér eru flestir hlutirnir komnir til ára sinna eða keyptir í RL búðinni og síðan fer mamma um þá höndum og gerir þá að sínum. Allt hér innandyra ber vott um listræna hæfileika hennar, málverkin á veggjunum eru eftir hana, myndir og smáhlutir unnir úr þæfðri ull og annað eftir því. Jafnvel þvottahúsið er listaverk út af fyrir sig þar sem veggirnir eru málaðir og stenslaðir eins og henni einni er lagið. Þvottaklemmurnar kúra í 40 ára gamla pokanum sínum, málaðar blómamyndum og öðru fallegu munstri sem lýsir kannski vel allri þeirri natni sem hún leggur í sín störf. Leirmunir og styttur dreifa sér á smekklegan hátt um húsið, einnig eftir hana og gamli bókaskápurinn með 200 og 300 ára gömlum bókum er í öndvegi í sjónvarpsholinu. Já, mamma mín er listamaður fram í fingurgóma og það virðist vera alveg sama hvað hún tekur sér fyrir hendur það verður allt alveg meiriháttar flott. Hún var ekkert að eyða í nýja eldhúsinnréttingu heldur gerði bara þessa gömlu að sinni og flottari innréttingar sér maður ekki oft. Ömmustelpurnar fengu að mála glerlistaverk á eldhúsgluggann og þannig merkja sér hluta af húsinu hennar ömmu. Eitt stykki raðhús er úti í garði handa fuglunum sem maðurinn hennar smíðaði og gefur þeim samviskusamlega að borða á hverjum morgni. Hvergi finn ég eins mikla hugarró og þegar ég kem í húsið þeirra mömmu og Jóns, þar sem allt virðist renna svo fyrirhafnarlaust og mamma situr með heklið sitt eða prjónana því ekki getur hún verið aðgerðarlaus. Ég vildi að ég hefði fengið þessa hæfileika hennar en verð víst að sætta  mig við að svo er ekki og fer bara hingað til að njóta þessa einstaka andrúmslofts.

Athugasemdir

[Erna Friðriksdóttir, 10.4.2008 kl. 15:01]

Mikið hlýtur húsið hennar mömmu þinnar að vera æðislegt   bestu kveðjur

[H Helga Gunnarsd. (IP-tala skráð) 10.4.2008 kl. 17:42]

Ég vona að þú hafir það æðislegt þarna á Sigló Bylgja mín, ekki veitir þér af.   Bið að heilsa mömmu þinni  

[didda (IP-tala skráð) 10.4.2008 kl. 18:18]

settu inn myndir

[Minnsti Bróinn (IP-tala skráð) 11.4.2008 kl. 10:05]

Stóra systir þú ert alveg æðisleg:)

bara varð að bæta því við líka:)

kv. frá neskaupstað

Snævar