Lýsi eftir svari frá Björgvin viðskiptaráðherra út af mygluhúsinu mínu

 

Það hefur ýmislegt gerst í okkar málum varðandi húsið undanfarna daga og einnig hefur verið ansi freistandi að láta eins og þetta hafi ekki gerst  og loka augunum en það hefst nú lítið upp úr því. Allavega ef ég ætla að vera Bylgja "veltiþúfa". Margur er knár þó hann sé smár en ég er einn og hálfur tommustokkur að lengd eins og maðurinn minn orðar það. En samt eru góðar fréttir og leiðinlegar fréttir sem að vísu koma ekki á óvart. Góðu fréttirnar fyrst: Nú þegar allt er tekið saman þá hefur fólk gefið okkur hvorki meira né minna en kr. 1.320.000,- og það er sko ekkert smáræði. Peningarnar hafa þegar komið sér vel. Keyptum rúmið fyrir jólin og borguðum sökkuleiningarnar fyrir nýja húsið út í hönd. Verður sennilega steypt í þær á morgun og við eigum fyrir því líka. Jibbí. Einnig hefur góður vinur okkar tekið upp á því hjá sjálfum sér að hella sér í okkar mál af þvílíkum fítonskrafti að leitun er að öðru eins. Símtölin og allur tíminn sem hann hefur eytt í okkar mál er náttúrulega algerlega ómetanlegur og ég er honum alveg afskaplega þakklát. Hundleiðinlegt að vera að berjast í þessu einn. Annar nágranni okkar er málari og er enn eitt lýsandi dæmi um góðvild náungans. Hann ætlar, hvorki meira né minna, að GEFA okkur málninguna innan í húsið. Ég er bara orðlaus og maðurinn minn veit ekkert í hvorn fótinn hann á að stíga. Svo þetta er allt á beinu brautinni.

Leiðinlegu fréttirnar eru þær að aðstoðarmaður Jöhönnu Sigurðardóttur var sá eini af þeim fjórum ráðherrum sem ég hef skrifað um mín mál sem sá ástæðu til að svara mér. Í svari sínu sagði hann að vísu að þetta tilheyrði ekki þeirra málaflokki en bað um leyfi mitt til að vísa þessu til Björgvins viðskiptaráðherra sem hann svo gerði strax. En nú eru liðnar nokkrar vikur síðan og enn hef ég ekkert heyrt frá Björgvini blessuðum eða aðstoðarmanni hans. Þessir blessuðu ráðherra virðast engan áhuga hafa á að kynna sér myglusvepp og mögulegar afleiðingar hans hvort sem er á félagslega sviðinu, tryggingasviði eða öðru. Hentar þeim betur að láta eins og hann sé ekki til á Íslandinu góða. Hélt samt að þeir þyrftu að svara öllum erindum sem þeim berast á einn eða annan hátt að annað væri brot á stjórnsýslulögum en svona er ég vitlaus.

Athugasemdir

[Markús frá Djúpalæk, 15.4.2008 kl. 10:30]

Samt má segja að leiðinlegu fréttirnar hafi þó verið ágætar að því leyti að aðstoðarmaður félagsmálaráðherra brást við. Það er samt svolítið merkilegt að manni skuli finnast það tíðindi þegar stjórnvöld bregðast við erindum okkar þegnanna... en þannig er það nú einhvern veginn samt.

[Bylgja Hafþórsdóttir, 15.4.2008 kl. 13:06]

Amm, ég varð ekkert smá hissa þegar ég sá bréfið frá Hrannari. Þannig að myndin er af Þórunni, Guðlaugi Þór og Björgvini. He he. Ekki heyra, sjá né tjá.

[Guðrún Jóhannesdóttir, 15.4.2008 kl. 14:22]

Þau þremenningarnir eru nú ekkert að láta svona "smámuni" trufla sig, enda eru þau á góðum stað í lífinu

Djöf.... er að eiga við svona, óska þer sannarlega alls góðs í þessari baráttu Bylgja mín 

[Kjartan Pálmarsson, 15.4.2008 kl. 14:29]

Segi það enn einu sinni og stend við það: BARÁTTUKVEÐJUR ÚR KÓPAVOGINUM

[Guðrún Jóhannesdóttir, 15.4.2008 kl. 15:16]

takk fyrir að samþykkja kerlu

[Óskar Arnórsson, 16.4.2008 kl. 05:57]

svar frá ráðherra! Þeir svara engum sem ekki eru í "klíkunni" þeirra..ég er búin að berjast svo mikið við þetta kerfi Bylgja mín, að mín reynsla er að það er betra að labba út í fjöru og tala við stein! Hjartað þeirra er úr svipuðu efni. Verð reiður fyrir þína hönd þó ég sé núna að vanda mig að verða ekki reiður út af einu eða neinu....ég ætla að styrkja þig þegar ég er búin að eignast eitthvað afgangs, því ég á ekkert nema skuldir sem að vísu eru búin að hjálpa mér að komast aðeins áleiðis að byrja að vinna aftur. 'a víst að fara varlega að þreyta mig ekki of mikið segir læknirinn sem ég er loksins farin að treysta 100%..

[Svandís Rós, 16.4.2008 kl. 09:25]

Langar svo að taka þátt í þessari baráttu með þér. Ég gafst upp á að berja hausnum við steininn og mæta bara skilningsleysi... stóð líka ein í þessu og er með mitt hjá lögfræðingi.

Endilega sendu mér mail á [e-mail]!