Menn og konur. -KAFFI- Konur og menn.

  

Skrítið hvað það sem manni hefur alltaf fundist sjálfsagt og eðlilegur hluti af tilverunni kveikir skyndilega hjá manni þankagang sem jafnvel manni sjálfum finnst ,,skrítinn". Þá á ég við þessa smálegu hluti sem maður venjulega leiðir ekki einu sinni hugann að. Fékk eina af þessum ,,hugljómunum" í morgun þegar ég fór til að taka bensín á bílinn. Þar blasti OLÍS við sem varð til þess að ég ákvað að skreppa þar inn til að láta Jón Andrjes vita að Sæunn kæmi ekki í hádegismat í dag. Erum að fara á Akureyri en það er önnur saga.

Fyrir utan OLÍS var eins og oftast fjöldi bíla. Margir siglfirskir karlmenn hafa nefnilega gert það að vana sínum að kíkja í kaffi til Jóns á morgnana. Það má eiginlega fullyrða að þetta sé aðal félagsheimili bæjarins fyrir kallana. Og ég fór að hugsa....

...af hverju gera konur þetta ekki. Siglfirskar eða ekki, ég veit ekki um neina ,,konubúð" þangað sem konurnar gera sér ferð, bara til að sýna sig og sjá aðra, spjalla og heyra nýjasta slúðrið. Hvernig ætli það yrði ef þær færu að droppa inn í Aðalbúðina eða Siglósport snemma morguns. Renna niður nokkrum sögum með kaffibolla og hlátri. Umm, gæti verið gaman. Konur fara finnst mér meira í heimsóknir til vinkvenna í frítímanum og fá þar útrás fyrir félagslega þáttinn í þeirra lífi. Karlarnir detta held ég sjaldnar inn í kaffi til vina sinna bara svona að gamni.

Kannski er þetta eitthvað í eðlinu. Veiðihópurinn kemur saman eða eitthvað álíka Hellisbúalegt. En sko bara, hvers lags vitleysa manni getur dottið í hug.

Skyldu Dóra og/eða Ella bjóða manni upp á kaffisopa ef maður birtist bara til að kjafta.

Athugasemdir

[Baldur Gudna (IP-tala skráð) 13.2.2009 kl. 15:16]

 Sæl frænka.

 Bara ad kvitta, og velkominn til heim Siglo.