Og það var rúntað.... ...á vörubílnum!!!

Gleðilegan páskadag landsmenn allir nær og fjær.  Maðurinn minn hafði í tvo daga talað um að bjóða mér í bíltúr og þar sem ég þekki mitt heimafólk, þá bara beið ég þolinmóð, vissi sem var að af rúntinum kæmi. Er náttúrulega búinn að vera að vinna eins og brjálæðingur í "#$%&/&$#" grunninum. En í gærkvöld var komið að bíltúrnum og þið getið ímyndað ykkur upplitið á mér þegar ég kom út og sá hvert farartækið var. Gamli Volvo-vörubíllinn sem gríðarlegum tíma hefur verið eytt í að gera sæmilega ökufæran. Já, það þurfti nefnilega að sækja litaða olíu á tunnu niðrá Skaga, þar sem grafan sem hann notar í grunninum var orðin olíulaus. Hundarnir fengu að koma með og allt í lukkunnar velstandi..... þar til við komum niður á veg. Hamingjan hjálpi mér, vissi að vegurinn væri lélegur en að þurfa að keyra hann á vörubíl, úff. Mikið vorkenndi ég þeim vörubílstjórum sem þurfa að hossast þetta vegskrifli, dag eftir dag til að komast í efnisnámurnar sem hér eru. Og ekki bara eina ferð á dag heldur ferð eftir ferð frá morgni og fram á kvöld. Hljóta að vera vel föst í þeim nýrun. Af hverju í ósköpunum sér Vegagerðin ekkí sóma sinn í því að gera þennan veg þannig úr garði að hann geti þjónað sínum megintilgangi sem er aðgangur að áðurnefndum námum. Það segir sig sjálft að vegur sem nær eingöngu er notaður af stórum og þungum vörubílum þarf að vera sérstaklega sterkbyggður. Þýðir ekkert að hafa einhverja drullu sem burðarlag undir veg sem þennan, það sér hver heilvita maður. Sveitabærinn sem ég bý á nú er eini bærinn sem er staðsettur þannig að við heimilisfólkið verðum að nota þennan veg til að komast niður á þjóðveg, annars eru þetta eiginlega bara vörubílar sem um hann fara og auðvitað á að hanna veginn út frá því. Er orðin hundfúl yfir að hossast þennan drulluslóða og ef kvartað er við vegagerðina þá senda þeir í mesta lagi hefil til að slétta úr verstu öldunum og fylla í stærstu holurnar, viðgerð sem endist í mesta lagi tvo daga. Meira að segja þegar rigningarnar gerði eftir áramótin þá varð vegurinn svo hrikalegur að vörubílarnir neyddust til að keyra að námunum hinum megin frá og eyðilögðu þar með þann hluta vegarins einnig. Það var lausnin sem þeir fengu frá Vegagerðinni þegar vegurinn Akranesmegin var orðinn ófær vegna þess að hann var notaður við aðstæður sem hann engan veginn þoldi. Engar öxulþungatakmarkanir ekki neitt, bara keyrt þar til vegurinn var ónýtur. Ég er ekki að ásaka bílstjórana, síður en svo. Þeir eru bara að vinna vinnuna sína og er boðið upp á vinnuaðstæður sem eru til háborinnar skammar. En þeir mættu samt alveg hætta að henda kaffiglösunum sínum út um gluggann. Bannað að verða svona af páskaeggjaáti.

Athugasemdir

[Óskar Arnórsson, 23.3.2008 kl. 19:57]

Gleðilega Páska Bylgja mín!

[Elísabet Sóley Stefánsdóttir, 24.3.2008 kl. 00:56]

Gleðilega páska elsku vinir, ég kem nú eiginlega af fjöllum elskulegu bestu "tengdaforeldrar" mínir og þínir eru greinilega svo upptekin að hjálpa mér í öllum mínum uppákomum og því sem fylgir að ég hef bara ekkert heyrt, enda ekki heldur spurt svo það er skiljanlegt :-(

Sendi ykkur samúðarkveðjur, enda er þetta missir og vona svo innilega að þið fáið hjálp til að byggja upp ykkar heimili á ný, verð að fara að taka rúnt til ykkar með skvísurnar, maður er bara alltaf á svo mikilli hraðferð og alltaf er nóg að gera :-)

KNÚS OG KRAM

Elísabet

[Eva Lind (IP-tala skráð) 26.3.2008 kl. 22:47]

Bylgja. Ég gat ekki annað en hlegið þegar ég las hvað vegurinn er orðinn slæmur...

Eftir að vegagerðin fór að skella á "bóndann" á fellsenda sá ég að þeim er skítsama um þennan veg. Við skruppum þarna uppeftir um daginn að sækja einhvað dót sem var úti í hesthúsi og Gunni bað mig vinsamlegast um að keyra hægar því bíllin myndi nú bara ekki þola þetta :)

Vona ykkar vegna að HELV vegagerðin fari að gera einhvað í þessu.