Bjargvættur bankar upp á..............

Í gærkvöld fékk ég heimsókn sem ef til vill væri ekki í frásögur færandi nema að gesturinn var kona sem ég þekki varla neitt. Yndisleg kona sem upp á sitt einsdæmi stofnaði handa  okkur reikning í Búnaðarbankanum og er búin að keyra um alla Hvalfjarðarsveitina, sem nær yfir geysistórt svæði, og safna undirskriftum held ég bara næstum allra í sveitinni. Allir eru boðnir og búnir til að aðstoða okkur og gaman þætti imér að vita hversu mikið af tíma sínum hún hefur gefið okkur og allt bensínið. En sem sagt í gær bankaði hún upp á til að færa okkur afraksturinn og svei mér, ég ætlaði ekki að þora að standa upp og opna og ég var svo stjörf að ég bauð henni ekki einu sinni inn. Þarna stóð ég í anddyrinu og hún líka og svo bara byrjuðu tárin að renna, ég sem var svo ákveðin í að láta það ekki gerast. Fékk ekki alveg jafn slæmt grátkast og þegar kvenfélagskonurnar bönkuðu upp á fyrir jólin og færðu okkur 500.000 kr. sem ég vissi alls ekki neitt um og átti enga von á en gat samt ekki ráðið við þetta. Reyndi að fela það með því að taka utan um hana og skildi þannig slatta af tárum eftir á kápunni hennar, sorry. Þetta er bara svo yfirþyrmandi tilfinning sem maður upplifir við að finna svona sterkan náungakærleik og fá hann beint í æð. Heilar fimm A4 blaðsíður, þéttskrifaðar nöfnum fólks sem er reiðubúið til að styrkja okkur fjárhagslega, kom hún með og dóttirin lét ekki laust né fast fyrr en hún fékk að reikna saman heildarupphæðina á blöðunum. Eiginmaðurinn kom heim skömmu síðar en þá hafði ég komist aðeins til sjálfs míns og við sátum inni í eldhúsi að spjalla. Og minn maður verður nú ekki oft orðlaus en þarna vissi hann bara ekkert hvernig hann átti að vera þegar hann sá hver komin var. Elsku S, veit ekki hvort hún vill láta nefna sig á nafn, þú ert frábær og ég þakka þér enn og aftur. Og elskulegu sveitungar, orð fá ekki lýst þakklæti okkar en samt Takk, takk, takk. Það er yndislegt að búa í Hvalfjarðarsveit og ef ég get einhvern tíma á einhvern hátt endurgoldið ykkur hjálpina þá geri ég það.

Athugasemdir

[Eva Lind (IP-tala skráð) 3.4.2008 kl. 12:30]

Æðislegt :)

[Markús frá Djúpalæk, 3.4.2008 kl. 12:40]

Þetta eru stórkostlegar fréttir

[Ragnheiður (IP-tala skráð) 3.4.2008 kl. 17:57]

vá frábært

knús og kossar frá okkur

[Elísabet Sóley Stefánsdóttir, 3.4.2008 kl. 20:39]

Æðislegt að heyra

knús og kram

Elísabet

[Guðríður Haraldsdóttir, 4.4.2008 kl. 21:18]

Mikið er fólk gott!!! Til hamingju með að eiga svona frábæra og yndislega nágranna. Gangi þér og ykkur allt í haginn.