HOTT HOTT BJÖRGVIN!!!

Sit og horfi út um stofugluggann og velti fyrir mér morgundeginum. Vörubílarnir á leið upp í námur keyra sína leið fram hjá húsinu sem ég bý í og rykið leggst eins og dula yfir allt bæði innandyra og utan. Sjálfstraustið er á sömu leið, líður eftir Fellinu og eitthvað langt í burtu. Ég er að reyna að hlaupa á eftir því og koma því á sinn stað en það er alveg sama hversu hratt ég hleyp alltaf er ég í humátt á eftir. Svei mér þá, mér líður eins og ég sé að fara fyrir dómara eða um það bil að fara að gera eitthvað hræðilegt af mér. Að ég, kelling úr Hvalfjarðarsveit, ætli að fara og hitta háæruverðugan viðskiptaráðherra. Þoli ekki þessa gríðarlegu óttablöndu virðingu sem ég hef alla tíð borið fyrir yfirvaldinu, hvort sem það voru skólastjórinn minn í barnaskóla, lögregla eða Björgvin. Ætli Björgvin sé að taka á móti mér af einhverri alvöru eða bara til að friða lýðinn og gerir svo aldrei neitt meira með þetta. Andsk. veit að ég má ekki hugsa svona en kvíðahnúturinn í maganum fer sístækkandi, dugar sem máltíð alveg þangað til á morgun ef ég þekki sjálfa mig rétt. En ég er búin að taka saman þá pappíra sem ég ætla að hafa með mér sem eru úrskurðirnir frá TM og úrskurðarnefnd almannatrygginga og skrifa niður punkta sem ég svo örugglega hiksta á og stama út úr mér eins og bjáni. En það verður þá bara að vera svo. Ég ætla að fara og ég ætla að gera mitt besta til þess að koma okkur Íslendingum framar á merina í sambandi við úrræði gagnvart myglusvepp. Óþarfi að við séum svona aftarlega þar eins og á svo mörgum öðrum sviðum. HOTT HOTT Björgvin.

Stefnumót við viðskiptaráðherra n.k. miðvikudag!!!

Ákvað það fyrir helgi þegar Birkir J. bjargvættur hringdi og lét mig vita af samskiptum sínum við viðskiptaráðherra varðandi okkar mál að bíða bara og sjá til. Ekki svekkja mig á því að sitja allan daginn og bíða eftir símtali sem e.t.v. kæmi svo aldrei. Satt best að segja þá átti ég alveg eins von á því að þetta símtal kæmi aldrei þar eð það er mín reynsla af því að reyna að ná í ráðamenn okkar fámennu þjóðar. Nei, þetta er ekki rétt hjá mér, hafa skal það sem sannara reynist. VAR reynsla mín allt þar til ég náði sambandi við ritara Jóhönnu Sigurðar. og svo Birkir að sjálfsögðu sem upp á sitt einsdæmi hafi samband við mig. En símtalið ER komið og kl. 10 núna á miðvikudaginn þarf mín að mæta niður á Sölvhólsgötu. Úff, ekki uppáhaldið mitt að rata í Reykjavík. Er áttavillt með eindæmum. Ruglast á hringtorgum og annað álíka fáránlegt. En þekki eldri hlutann sæmilega síðan ég var í Versló í gamla daga og treysti á að það dugi mér og svo er það bara símaskráin. Fækkar ört kortasíðunum í henni, ríf þær alltaf úr.  

En nú er bara að vakna snemma á miðvikudagsmorguninn, spartla á sér andlitið og vera vel undirbúin. Ef einhver skyldi vera að undra sig á því af hverju ég vildi fá að hitta viðskiptaráðherra þá er það vegna þess að tryggingafélögin heyra undir hann eða lög um tryggingafélög. Er að kanna núna undir hvern skipulags-og byggingarlög heyra og lög um fasteignakaup og fasteignasala. Það er viss ástæða fyrir því sem ég ætla ekki að tjá mig um að sinni. En eftir að hafa fengið ný gögn í hendur, sem ég var búin að leita að ansi lengi þá hafa ýmsar forsendur breyst og ég því ákveðið að fá mér annan lögfræðing, (alltaf að fá annað álit, er það ekki í bíómyndunum)? Ég bara get ekki kyngt því þegjandi og hljóðalaust að réttarkerfið okkar sé svona ósanngjarnt, verð að ganga úr skugga um það sjálf og skoða allar leiðir.

Nú er bara að reyna að vera málefnaleg á miðvikudaginn og vaða ekki úr einu í annað. Verður kannski svolítið erfitt þegar manni liggur svona mikið á hjarta. Veit heldur ekkert hvað ég fæ langan tíma með Björgvini en ég met það mikils að hann skuli gefa sér tíma til að hitta myglusveppakerlinguna mig og ætla þess vegna að standa mig.

Syndugur bókaormur!!!

 

Ég er og verð lestrarhestur, hef verið það síðan ég varð læs og læt örugglega jarða nokkrar góðar með mér þegar þar að kemur. Er ein af þeim sem var búin með barnadeildina á bókasafninu 11-12 ára og farin yfir í fullorðinsdeildina. Erfði þetta frá pabba sem átti fjöldann allan af bókum og það voru margir dagarnir hjá mér þegar ég var krakki sem fóru í að koma sér vel fyrir upp á háalofti og stúta þar hverjum bókakassanum á fætur öðrum. Tom Swift, Benna bækurnar, Frank og Jói, nefndu það. Margar bækur las ég oftar en einu sinni og oftar en tvisvar og geri enn. Er svo heppin að systir mín vinnu á bókasafni og þar fæ ég bækurnar sem ég bara tími ekki að kaupa. Ef ég keypti allar þær bækur sem mig langar til að lesa og hef lesið í gegnum árin ja, þá þyrfti ég að eiga Perluna. Fer nú samt stundum í Kolaportið og kaupir gamlar perlur þar sem ég hef ekki lesið. En undanfarin ár svo skömmustulegt sem það nú er þá hefur áhugasvið mitt á bókum þrengst  á þann hátt að ég á ekki mikið af íslensku bókunum. Amazon er fjársjóður í mínum augum. Hvílíkt magn af góðum bókum sem þar er og listagóðum höfundum sem aldrei hefur heyrst talað um hér á Íslandi. Var einmitt að panta slatta í síðustu viku og þ.á.m eftir einn höfund sem ég hef ekki lesið neitt eftir og langar til að kynnast. Af bókum  á íslensku er samt alltaf keypt handa unglingnum því sem betur fer les hún líka. Ávítaratáknið, Einhyrningsbækurnar, Molly Moon, Börn lampans, og fleira og mamma stútar þessu öllu saman líka. Ástarsögur þó gæti ég ekki lesið, þótt mér væri borgað fyrir það, eða bækur eins og "Hvar er barnið mitt" og þess háttar. Flest annað gæti endað á náttborðinu hjá mér eins og sjá má á bókalistanum á síðunni minni. Verð nú samt að fara að uppfæra hann.  Ég eltist ekki við frægu íslensku höfundana, les þá ef mér finnst þeir góðir og ef ég fæ þá lánaða. Kaupi samt bækurnar Yrsu til að eiga þegar þær koma í kilju. Ólafur Jóhann finnst mér frábær og Hníf Abrahams pantaði ég í jólagjöf, fékk þrjár, he he.

4,6 bækur á hverja þúsund íbúa

Klukkan farin að ganga í miðnætti og hugurinn ekki tilbúinn að fara í hvíld.

Næturnar  við undirspil fjórfaldans skammts af hrotum eru samt ekki ástæðan. Þær gefa mér bara öryggistilfinningu og sýna mér að ég er ekki ein, Nei, það er hugurinn sem segir stopp. Er orðin svo þreytt eftir erilsaman dag en langar ekki að skríða inn í rúm og velta mér þar og bylta af því að ég get ekki stoppað hausinn á mér. Ég er föst í þeim vítahring að heilinn tekur af mér völdin og fer að hugsa um allt það sem ég vil ekki hugsa um, það sem það heldur fyrir mér vöku. Sama hvað ég reyni að einbeita mér að einhverju öðru og jákvæðara þá bara gengur það aldrei. Maðurinn minn þarf ekki annað en að sjá koddann sinn þá er hans eins og skotinn. Hef bara verið svona frá því ég man eftir mér og það eru jafnvel ótrúlegustu hlutir úr fortíðinni sem láta á sér kræla, svona rétt til að minna á sig. En eins og góður vinnufélagi minn sagði alltaf þegar hann var þreyttur og geisparnir tóku völdin: ,,Ja, nú held ég að ég sé að geispa golunni" Held  ég vitni í hann og skríði í bælið, sakar ekki að reyna, alltaf hægt að fara fram aftur, Góða nótt, kæru bloggvinir og aðrir.

Spaugstofumenn sýna enn og aftur snilldartakta

 

Held að alþingi ætti að leiða í lög að áhöfnin á þjóðarskútunni verði skyldug til að horfa á spaugstofuna á laugardagskvöldum. Glöð myndi ég greiða laun þeirra við áhorfið það. Enn einu sinni tókst þeim spaugstofumönnum á sinn einstaka hátt að draga saman og gera hæfilega mikið grín að ástandinu í þjóðfélaginu þessa dagana. Björgvin Franz var svo rjóminn á kökuna í hverju gervinu á fætur öðru eins og honum einum er lagið. Það þarf einstaka hæfileika til að gera eins alvarlega hluti jafnfyndna eins og þeim tókst í gær að gera og í leiðinni halda manni við efnið að það sé eitthvað mikið að. Okkur Íslendingum hættir nefnilega til að gleyma, það er svo helvíti hentug leið til að forðast það að gera eitthvað sjálfur í málunum. Gott að þykjast bara ekki muna og láta aðra um að vinna vinnuna. Hversu lengi ætla Reykvíkingar t.d. að horfa í hina áttina varðandi stjórnunina á höfuðborginni okkar í von um að hlutirnir leysist án þess að þeir þurfi að hafa eitthvað fyrir því. Það er löngu orðið tímabært að þeir sem þykjast vera að stjórna borginni viðurkenni fyrir sjálfum sér og öðrum að þeir hafi reist sér hurðarás um öxl og fari og finni sér starf sem hæfir þeirra kunnáttu. Kjartan, sagnfræðingur gæti kennt mannkynssögu, Gísli getur farið í sjónvarpið og brosað þar sínu sakleysilega brosi framan í landsmenn. Það virkaði þar en því miður, Gísli minn, þá virkar það ekki í borgarstjórn. Vilhjálmur, vilt þú ekki bara skella þér á eftirlaun, Ólafur gæti stundað huglækningar. Þessir fjórir sérstaklega finnst mér að ættu að láta sig hverfa, leyfið Hönnu Birnu, Júlíusi og þeim sem eitthvað hafa í kollinum um stjórnunarhætti að sanna sig. Þau gætu þá fengið til  liðs við sig fólk sem veit hvað það er að gera og hugsar ekki bara um rassinn á sjálfum sér. Takið Björn Inga til fyrirmyndar og látið ykkur hverfa ef þið getið ekki farið eftir litlu gullkorni úr Dýrunum í Hálsaskógi. ,,Öll dýrin í skóginum eiga að vera vinir".

Enn aftur að spaugstofunni. Múmíur sem hagfræðingar Seðlabankans, Bónus grísinn eina sem unnið gat á greifanum, snilld, snilld og aftur snilld. Áfram svona Spaugstofumenn.

Varð að skella þessu myndbandi hérna inn, lýsandi fyrir????

http://kvikmynd.is/video.asp?land=&offset=0&ba=leita&leit=gíraffi%20í%20kviksyndi&id=2711

Er Ragnar Reykás ráðgjafi borgarstjórnar.

Þetta er orðið svo fáránlega að það er ekki einu sinni fyndið. Eiga REI. Selja REI. Er þetta virkilega það sem er hvað brýnast á borðum meirihlutans. Meirihluta sem ekki einu sinni var kosinn heldur er orðið samansafn af eiginhagsmunapoturum og þvermóðskupúkum sem þykjast vera að vinna saman til þess eins að geta sagst vera í meirihluta og ráði málefnum borgarinnar. Held að þetta lið ætti að sjá sóma sinn í að afhenda stjórn skútunnar í hendur annarra.

Tillaga um sölu á REI?

Hvað er REI???

Er ekki alveg að fatta þessa umræðu um mögulega sölu á REI. Hvað er REI ef það er ekki lengur hluti af OR. Tilgangurinn með stofnun REI??? Var hann ekki að koma á framfæri og selja þá sérfræðiþekkingu sem til staðar er á Íslandi í þessum geira. Hvar er sérfræðiþekkingin, hún liggur hjá OR, hvar er fjármagnið, hjá OR. Hvað er þá verið að selja spyr ég, nafnið, hvers virði er það. Eru allir búnir að gleyma ásókn Geysis Green í REI. Ásókn sem byggðist einvörðungu, leyfi ég mer að segja á því að þá vantaði að ná til sín þessari sérfræðiþekkingu sem eingöngu OR býr yfir. Það var ekkert að ástæðulausu sem OR tryggði sér 20 ára rétt á þekkingu sinni þá.  

Vill að Reykjavíkurborg selji REI

Aldrei verð ég jafnaðarkvenmaður

Nú er endanlega búið að sannfæra mig um að ég er eins ójöfn og nokkur getur orðið og er algerlega fullkomnlega sátt við mínar ójöfnur. Bæði þessar utanáliggjandi og óstraujaðar skoðanir mínar. Ekki er ég örvhent og/eða   svo þá er búið að útiloka flokkinn sem ber  það ágæta nafn. En ég er búin að komast að því, komin hátt á fimmtugsaldurinn að ég hef skoðanir á ýmsu sem ég vissi ekki  að ég hefði skoðanir á eða alltént tjáði mig lítið um. Eins og augljóst er á þessari síðu þá hef ég sterkar skoðanir á vegakerfinu og samgöngum. Vil að breyting verði á hugsunarhætti gagnvart innflytjendum og andúð í þeirra garð. Ég styð vörubílstjóra heilshugar í þeirra baráttu sem ásamt stórhug íslenskra eignamanna sýnir að ég er hrifin af einstaklingsframtaki og er það  helsta ástæðan fyrir þessum hugleiðingum nú. Eftirfarandi athugasemd sem ég fékk á bloggið mitt fer bara ekki úr hausnum á mér svo  fáránleg finnst mér hún vera og má því til með að deila henni með ykkur og ausa aðeins bát að nafni Bylgja.

Tilvitnun hefst:

,,Auðvitað eiga ekki að þurfa að vera styrktarfélög háð duttlungum einhverra gjafara hvort félagið lifi eða deyi. Ríkið á að sjá til þess að sjúkrahús séu fullmönnuð og búin bestu tækjum. Góðgerðarfélög eiga að vera óþörf. Skattar eiga að vera svo háir að hægt sé að standa undir öllu þessu og ölmusugjafir séu óþarfar. Það er mín skoðun og fleiri jafnaðarmanna. :)"

Tilvitnun lýkur.

Uhummhemm, hóst hóst. Finnst engum nema mér ofangreind fullyrðing sýna lítilsvirðingu í garð þeirra sem láta sér annt um náungann og hafa helgað líf sitt því að hjálpa öðrum. Kvenfélögin, Kiwanis, Lions, mæðrastyrksnefnd. Skattar svo háir að þeir standi undir...  ...ölmusugjafir óþarfar. Það búa hér 300.000 manns og það eru takmörk fyrir því hversu langt er hægt að ganga í að skattpína þessar fáu hræður. Á stöðum eins og t.d. Siglufirði fer hlutfall þeirra sem borgar skatta sífellt lækkandi vegna óhagstæðrar aldursskiptingar. Að tala um gjafir fólks og fyrirtækja til félaga eins og fyrir langveik börn og MND félagsins sem einhverja duttlunga. Hvað með Vildarbörn er það líka óþörf ölmusugjöf, á bara ríkið að borga. Víða um heim eru bæði skólar og heilu deildirnar á sjúkrahúsunum reknar með  frjálsum framlögum sem er þörf viðbót við það sem þeir fá frá ríkinu og nýtist til að renna enn styrkari stoðum undir viðkomandi rekstur. Af hverju má ekki gera það hér. Við erum ríkið, peningarnar sem þeir nota eru okkar og forræðishyggjan sem felst í þessu finnst mér með eindæmum.  Við erum að borga fyrir tækin og tólin, menntun barnanna okkar með því að borga skatta. Af hverju mega þeir sem geta ekki borga eitthvað umfram á þennan máta. Þarf ríkið endilega að ráðstafa hverri krónu fyrir okkur, af hverju megum við ekki gera það sjálf. Hvernig ætti Hofsós t.d. að hafa efni á því að byggja jafn sjálfsagðan hlut og sundlaug fyrir íbúa sína. Það er alltaf gengið að þess konar sem vísu á höfuðborgarsvæðinu  þar sem hægt er að velja úr sundlaugum af því að þar standa 200.000 manns undir rekstri borgarinnar. Ekki 1000 eða 300 eins og svo víða úti á landi. Hafið mína þökk þeir sem leggja sitt af mörkum af fúsum og frjálsum vilja. Hafið mína þökk góðgerðarsamtök um land allt. Björgunarsveitir, líknarfélög og allir þeir sem byggja tilveru sína á ,,duttlungarfullum" einstaklingum og fyrirtækjum.

Birkir J.Jónsson þingmaður er maður framkvæmda!!!

 

Ég  fékk símtal í dag og konan sem í símanum var sagðist vera að hringja frá Alþingi. Eitt augnablik flaug mér í hug að einhver væri að gera at í mér en þegar hún hélt áfram og sagði að Birkir J.Jónsson alþingismaður vildi gjarnan tala við mig þá vissi ég að svo var ekki. Eins og eflaust einhverjir hafa rekist á þá hefur hann á vinsælli bloggsíðu sinni séð ástæðu til að fjalla um okkar mál og kann ég honum bestu þakkir fyrir. Hann er allur af vilja gerður til að hjálpa okkur í baráttunni við að vekja athygli á myglusvepp og mögulegum afleiðingum hans og það sem hann afrekaði í dag. Ja, ég varð bara kjaftstopp. Hann hringdi í háttvirtan viðskiptaráðherra, alla leið til Kína þar sem hann er víst staddur núna og ræddi okkar mál við  hann. Og ekki nóg með það. Á morgun mun ritari Björgvins hringja í mig og ég á að fá fund með honum strax n.k. mánudag. Ef þetta er ekki frábærara en frábært þá er ekkert það. Jibbí húrra hei. Elsku Birkir, þú ert góður maður. Og nú er eins gott að undirbúa sig vel fyrir fyrirhugaðan fund og ná í sjálfstraustið sem er geymt í innsta horni fataskápsins þessa dagana. Ætti ég að fá einhvern til að fara með mér.???

Lítil saga frá litlu landi.

Landið er Ísaland og sögusviðið höfuðborgin og þar hefur ýmislegt átt sér stað að undanförnu sem heldur betur hefur hrist upp í því rótgróna samfélagi sem borgin var. Áður en nokkur hefur áttað sig á  hvað snýr fram og aftur á veröldinni er Íslendingavík orðin fjölmenningarsamfélag og um götur borgarinnar gengur nú fólk af alls kyns þjóðernum og með alls kyns litarhátt. Það er af sem áður var að Ísalendingar sneru sér við á götu ef þeir sáu manneskju með annan húðlit en hvítan. Skiptingin í hverfum borgarinnar sem hefur verið til staðar svo lengi sem elstu menn muna er nú öll að riðlast, hverfi 1001 og 1005 og fleiri álíka virðuleg eru nú farin að fá íbúa sem kunna ekki einu sinni íslensku. Og það sem er enn hræðilegra að innan um leynast glæpalýður og afbrotamenn. Eitthvað sem miðað við viðbrögð borgarbúa hefur aldrei verið til á Ísalandi. Það bara getur ekki átt sér stað að hingað leiti óþjóðalýður af þessu tagi.

Fólkið á Ísalandi hefur nefnilega þróað með sér sérstaka hæfileika í gegnum árin. Hæfileikann til að loka augunum fyrir alvarleika sömu mála þar sem Ísalendingar koma á einhvern hátt við sögu. Einungis elstu menn þora að viðurkenna að þeir muni eftir þeim glæpum, nauðgunum og morðum sem framin hafa verið hér á landi af Íslendingum og á Íslendingum. Þessum sérstaka hæfileika fylgir einnig annar enn betri og það er að láta skemmda eplið ekki skemma út frá sér. Sagt er frá af skyldurækni í fjölmiðlum ef Íslendingur kemur við sögu í afbroti sem framið hefur verið og passað upp á að fréttin sú sé stutt, hnitmiðuð og fari ekki út í einhver allt önnur mál sem koma viðkomandi glæp ekkert við. Ættingjar glæpamannsins ísalenska, vinir hans eða samlandar þurfa ekki að koma fram fyrir alþjóð til að reyna að réttlæta tilveru sína og reyna að sannfæra aðra um að þeir séu bara venjulegt fólk þrátt fyrir að vera af sama þjóðerni og glæpamaðurinn ísalenski.

En nú eru komnir hingar útlendingar og þessum hæfileika er nú ekki hægt að sóa á þá. Þá er nú heldur betur komið annað hljóð í strokkinn. Ef einhver grunur leikur á að einn þessarra útlendinga sé eða geti verið afbrotamaður nú þá bara hlýtur hann að vera búinn að skemma öll hin eplin í kassanum líka. Ættingjar hans, vinir og fólk sem hann hefur aldrei séð en vogar sér að vera frá sama landi og hann fá sama stimpil. Glæpamenn og  óþjóðalýður, öllum til ama og leiðinda. Farið burt úr fína landinu okkar, burt úr fínu borginni okkar, huff puff.

Sér einhver ósamræmið í þessu. Hvar er virðingin fyrir nýbúunum okkar. Af hverju eru mál þeirra ekki meðhöndluð af fjölmiðlum og okkur á sama hátt og ef um Íslending væri að ræða. Það eru allir jafnir fyrir lögunum, hvort sem þeir tala spænsku, pólsku eða íslensku.